Ministria e Financave ka nënshkruar katër marrëveshje me tri institucione vendore në kuadër të Projektit për Zhvillimin e Sektorit Financiar, i cili po zbatohet me mbështetjen e Bankës Botërore përmes Asociacionit Ndërkombëtar për Zhvillim (IDA).

Marrëveshjet synojnë forcimin e sektorit financiar, rritjen e qasjes në financa për bizneset, modernizimin e sistemeve të pagesave dhe fuqizimin e mekanizmave për mbrojtjen e depozituesve.

Në kuadër të këtyre marrëveshjeve, me Fondin Kosovar për Garanci Kreditore është nënshkruar marrëveshje granti në vlerë prej 4.7 milionë euro e dedikuar për rritjen e kapitalit dhe zgjerimin e garancive kreditore për ndërmarrjet mikro, të vogla dhe të mesme, me fokus në bizneset në pronësi të grave, startup-et dhe bizneset eksportuese.

Gjithashtu, është nënshkruar marrëveshje granti prej 4.75 milionë euro me Bankën Qendrore të Republikës së Kosovës për krijimin e një Sistemi Modern dhe të Ndërveprueshëm të Pagesave të Shpejta, i cili do të kontribuojë në rritjen e efikasitetit të pagesave digjitale në vend.

Me Fondin Kosovar për Sigurimin e Depozitave janë nënshkruar marrëveshje kredie dhe granti, secila në vlerë prej 11.85 milionë euro, për kapitalizimin e Fondit, forcimin e kapaciteteve institucionale dhe mbështetjen e rritjes së limitit të mbulimit të depozitave të siguruara.

Ministria e Financave mbetet e përkushtuar në zbatimin e reformave që forcojnë stabilitetin e sektorit financiar, përmirësojnë qasjen në financa për bizneset dhe avancojnë modernizimin e shërbimeve financiare në Republikën e Kosovës.