Mbahet “Tryeza e Sportit”, diskutohet për politikat sportive për vitin 2024

Përfaqësues të institucioneve, federatave sportive dhe të komunitetit sportiv u bënë përsëri bashkë në platformën “Tryeza e Sportit”, e pesta më radhë e organizuar nga Ministria e Sportit në bashkëpunim me Komitetin Olimpik të Kosovës.

Qëllimi i këtij takimi ishte diskutimi mes akterëve të sportit në raport me prioritetet e politikave sportive për vitin 2024, ka njoftuar MKRS-ja.

Në hapje folën zëvendësministrja Daulina Osmani, presidenti i Komitetit Olimpik të Kosovës, Ismet Krasniqi, dhe presidenti i Komitetit Olimpik Kombëtar Shqiptar, Fidel Ylli.

Diskutimi në tryezë u nda në dy panele të ndryshme, ku tema në panelin e parë ishte reforma ligjore në sport, ndërsa në panelin e dytë politikat sportive dhe prioritetet për vitin 2024.

Në kuadër të reformës ligjore u prezantua dhe u diskutua Ligji i ri i sportit, Ligji Anti-Doping, Ligji për parandalimin e dhunës në sport, si dhe ndikimi i reformës tek komunitetet sportive.

Ndërsa tek politikat sportive dhe prioritetet për vitin 2024 u diskutua rreth organizimit të garave ndërkombëtare, pjesëmarrjes në Lojërat Olimpike dhe Lojërat Mesdhetare Prishtina 2030, pjesëmarrjes së parë të Kosovës në Lojërat Paralimpike, si dhe mbështetjes financiare përmes thirrjeve publike në sport për sivjet.

Panelistë në këto diskutime ishin trajneri i mirënjohur i xhudos, Driton Kuka, presidentja e Komitetit Paralimpik të Kosovës, Njomza Emini, Elvira Dushku, sekretare e përgjithshme ë FBK-së, Kushtrim Krasniqi, zyrtar për media në KOK, Jeton Oruqi, ekspert ligjor, Bernard Tahirbegolli, koordinator i Kos ADA, Rinor Hoxha, ekspert ligjor, Blerina Imeri, udhëheqëse e zyres ligjore në KOK.