Kampionia olimpike Majlinda Kelmendi dhe kryemjeshtri Driton Kuka kanë vizituar sot Përfaqësuesen A të Kosovës në basketboll gjatë stërvitjes së saj në Palestrën e Sportit “Karagaç” në Pejë.

Vizita u zhvillua në prag të Kampionatit Evropian për Shtetet e Vogla, i cili do të mbahet nga 23 deri më 28 qershor në Pejë.

Gjatë takimit me basketbollistet, Kelmendi dhe Kuka ndanë përvojat e tyre nga rrugëtimi drejt sukseseve më të mëdha sportive, duke folur për rëndësinë e përkushtimit, disiplinës dhe mentalitetit fitues.

Përmes historive personale dhe mesazheve motivuese, ata inkurajuan sportistet që të besojnë në aftësitë e tyre dhe të japin maksimumin në garat që i presin.

Në shenjë respekti dhe mirënjohjeje për vizitën, Përfaqësuesja e Kosovës në basketboll i dhuroi Majlinda Kelmendit një dhuratë simbolike.

Nga kampi i xhudos u janë uruar suksese basketbollisteve kosovare në Kampionatin Evropian, ndërsa është falënderuar edhe Federata e Basketbollit e Kosovës për mikpritjen.