Kryesia e Lidhjes Demokratike të Kosovës (LDK) ka miratuar me unanimitet të plotë marrëveshjen politike për tejkalimin e krizës institucionale dhe përmbylljen e procesit të zgjedhjes së Presidentit të Republikës së Kosovës.

Në deklaratën e publikuar pas mbledhjes, LDK-ja bëri të ditur se ka mbështetur nominimin e profesor Bekim Sejdiu për President të Kosovës.

Sipas LDK-së, vendimi është marrë në përputhje me mandatin e dhënë nga Kuvendi i partisë, procedurat vendimmarrëse dhe përgjegjësinë për garantimin e stabilitetit institucional dhe funksionimin e rendit kushtetues.

Në deklaratë theksohet se procesi nuk lidhet vetëm me zgjedhjen e një individi, por me ruajtjen e institucioneve të Republikës, shmangien e një krize të re politike dhe krijimin e kushteve për funksionim të qëndrueshëm institucional.

LDK-ja vlerëson se Sejdiu i përmbush kriteret për këtë detyrë, duke veçuar përgatitjen e tij si jurist, përvojën si profesor universitar, diplomat dhe ish-gjyqtar i Gjykatës Kushtetuese.

“Kandidatura e tij i shërben nevojës së vendit për një President që qëndron mbi ndarjet partiake, respekton me përpikëri Kushtetutën dhe përfaqëson Republikën me seriozitet brenda dhe jashtë vendit”, thuhet në deklaratë.

Kryesia e LDK-së u ka bërë thirrje deputetëve të Grupit Parlamentar të kësaj partie që gjatë votimit të veprojnë në përputhje me autorizimet e Kuvendit të LDK-së, vendimin e Kryesisë dhe përgjegjësinë si përfaqësues të partisë.

Në fund, LDK-ja ka theksuar se do të vazhdojë të veprojë me “maturi, unitet dhe përgjegjësi”, duke vendosur mbi të gjitha interesin e Republikës së Kosovës.