E ardhmja e Santiago Gimenez te Milani vazhdon të jetë e paqartë.

Sulmuesi meksikan është futur në radarët e Lazios, me klubin kryeqytetas që po shqyrton mundësinë e transferimit të tij gjatë merkatos së verës.

Sipas raportimeve nga Italia, trajneri i ri i Lazios, Gennaro Gattuso, e vlerëson Gimenez si një profil ideal për repartin ofensiv dhe dëshiron ta ketë në skuadër sezonin e ardhshëm.

Megjithatë, te Milani ende nuk është marrë një vendim përfundimtar.

Drejtuesit kuqezi po analizojnë situatën e sulmuesit 25-vjeçar, i cili nuk arriti të përmbushë pritshmëritë pas transferimit të bujshëm nga Feyenoordi.

Dëmtimet dhe mungesa e vazhdimësisë kanë ndikuar në formën e tij, duke bërë që në klub të ketë diskutime për të ardhmen e lojtarit.

Milani investoi rreth 35 milionë euro për ta sjellë Gimenez në “San Siro”, prandaj nuk pritet ta lërë të largohet lehtësisht.

Nga ana tjetër, edhe vetë futbollisti ka shprehur në disa raste dëshirën për të treguar vlerat e tij me fanellën kuqezi, çka e bën edhe më të komplikuar çështjen e një largimi të mundshëm.

Për momentin Lazio mbetet e interesuar dhe po monitoron zhvillimet, por topi është në fushën e Milanit.

Javët e ardhshme pritet të jenë vendimtare për të kuptuar nëse Gimenez do të vazhdojë aventurën në Milano apo do të nisë një kapitull të ri në Serie A me fanellën bardhekaltër./Klankosova.tv