Kurti vazhdon takimet për formimin e qeverisë së re

Kryeministri Albin Kurti, i shoqëruar nga zëvendëskryeministri i parë, Besnik Bislimi, priti sot në takim ministrin e Zhvillimit Rajonal, Fikrim Damka, njëherësh kryetar i Partisë Demokratike Turke të Kosovës (KDTP), bashkë me kryetarin e Komunës së Mamushës, Abdülhadi Krasniç, që gjithashtu mban pozitën e nënkryetarit të KDTP-së.

Bashkë diskutuan për hapat përpara për formimin e institucioneve të legjislaturës së 9-të të dalë nga zgjedhjet e rregullta parlamentare të 9 shkurtit.

Kryeministri Kurti falënderoi Damkën për punën si ministër i kabinetit në këtë mandat të plotë të qeverisë dhe për bashkëpunimin e afërt si në qeveri ashtu edhe në kuvend.

Të dyja palët shprehën vullnetin dhe gatishmërinë që ky bashkëpunim i frytshëm të vazhdojë edhe në legjislaturën në vijim.

Ky takim u mbajt në kuadër të konsultimeve me partitë politike të komuniteteve joshumicë për formimin e qeverisë së re pas certifikimit të rezultateve nga Komisioni Qendror i Zgjedhjeve.

Po ashtu ai ka pritur në takim edhe deputetin e zgjedhur të legjislaturës së 9-të, Veton Berisha, njëherësh kryetar i Partisë Liberale Egjiptiane (PLE).

Kryeministri Kurti e uroi Berishën për mandatin e deputetit dhe rikthimin e tij në Kuvendin e Republikës.

Diskutuan për procesin e konstituimit të kuvendit dhe formimit të qeverisë së re pas certifikimit të rezultateve nga zgjedhjet e 9 shkurtit.

U theksua rëndësia e formimit të institucioneve brenda afateve ligjore dhe kushtetuese.

Kurti gjithashtu ka pritur sot nw takim edhe kryetaren e partisë Unionit Social Demokrat, Duda Balje.