Kryeministri në detyrë dhe kryetari i Lëvizjes Vetëvendosje, Albin Kurti, ka reaguar pas përfundimit të procesit të numërimit të të gjitha votave, duke falënderuar qytetarët për besimin e dhënë në zgjedhjet e 7 qershorit.

Kurti ka postuar një video në ‘Facebook’ se kjo fitore, sipas tij, është rezultat i mbështetjes së madhe qytetare brenda Republikës dhe në mërgatë, si dhe angazhimit të aktivistëve dhe vullnetarëve të partisë.

Ai theksoi se rezultati zgjedhor ka rikonfirmuar Lëvizjen Vetëvendosje si partinë e parë, me 53 deputetë në Kuvendin e Kosovës, duke shtuar se tani pritet certifikimi i rezultateve për të nisur procesin e formimit të institucioneve të reja.

Postimi i tij:

Dje përfundoi procesi i numërimit të të gjitha votave. Ju falenderoj përzemërsisht për besimin e dhënë! Kjo fitore e fuqishme vjen si rezultat i mbështetjes së madhe qytetare brenda Repulikës dhe në mërgatë, si dhe angazhimit të mijëra qytetarëve vullnetarë, anëtarëve e aktivistëve të Lëvizjes që nuk u ndalën asnjëherë.

Rezultati i zgjedhjeve të 7 qershorit, tregoi që nuk kishim nevojë për zgjedhje të reja, sepse rezultati nuk ka ndryshuar dhe aq. Si VETËVENDOSJE! jemi rikonfirmuar si partia e parë, me 53 deputetë, dhe tash presim certifikimin e rezultatit të zgjedhjeve në mënyrë që të nisim punën në drejtim të formimit të institucioneve të reja, për të vazhduar punët e mira dhe projektet zhvillimore.