Kryeministri në detyrë, Albin Kurti, ka thënë të martën se do të presë certifikimin e rezultateve të zgjedhjeve parlamentare të 7 qershorit për të nisur më pas “menjëherë” komunikimet për formimin e institucioneve të reja.

“Porsa të certifikohet rezultati, fillojmë komunikimet menjëherë”, tha ai në një përgjigje për gazetarët.

Kosova mbajti zgjedhjet e treta parlamentare në rreth një vit e gjysmë dhe tani duhet ta zgjedhë presidentin e ri.

Komisioni Qendror i Zgjedhjeve planifikon që certifikimin e rezultateve të zgjedhjeve parlamentare të 7 qershorit ta bëjë deri më 6 korrik.

Sipas Kushtetutës së vendit, seanca konstituive duhet të mbahet brenda 30 ditëve nga data e shpalljes zyrtare të rezultateve të zgjedhjeve.