Në Gjakovë është prezantuar lista prej 110 kandidatëve për deputetë të koalicionit VETËVENDOSJE!, Guxo, Alternativa dhe PShDK, në një tubim të madh të mbajtur në sallën “Shani Nushi”.

Kryeministri dhe lideri i Lëvizjes VETËVENDOSJE!, Albin Kurti, ka thënë se zgjedhjet paraqesin përballje mes “dy ideve për Kosovën”.

Sipas tij, njëra ide e sheh shtetin si “të përbashkëtën tonë më të madhe”, si mjet për drejtësi, zhvillim dhe dinjitet, ndërsa ideja tjetër “e sheh shtetin si pronë të pakicës, si privilegj grupor dhe pushtet për vete”.

Postimi i Kurtit:

Në Gjakovë, me një tubim madhështor, prezantuam listën prej 110 kandidatëve.

Këto zgjedhje janë mes dy ideve për Kosovën. Njëra ide është e jona, që e sheh shtetin si të përbashkëtën tonë më të madhe, si shtet të të gjithëve, si mjet për drejtësi, për zhvillim dhe për dinjitet. Ideja tjetër, ajo e tyre, e sheh shtetin si pronë të pakicës, si privilegj grupor, si pushtet për vete.

Lista e kandidatëve për deputetë e koalicionit VETËVENDOSJE!, Guxo, Alternativa dhe PShDK është një hartë e Kosovës që punon, e shtetit që mendon, e shoqërisë që sakrifikon, e popullit që nuk e sheh shtetin si plaçkë momenti, por si përgjegjësi historike.

Na priftë e mbara!