Kryeministri në detyrë i Republikës së Kosovës, Albin Kurti, mori pjesë në fillimin e punimeve të autostradës Shkup – Bllacë.

Pasi tha se autostrada Shkup-Bllacë do ta forcojë lidhjen infrastrukturore ndërmjet dy shteteve, kryeministri Kurti theksoi se rëndësia e saj shkon përtej infrastrukturës, sepse se do të shkurtohet distanca, do të lehtësohet lëvizja dhe do të krijohen mundësi të reja bashkëpunimi për qytetarët dhe ekonomitë.

“Ne jemi dy shtete që kanë qarkullim të lartë të qytetarëve në të dyja anët e kufirit. Familjet, studentët, punëtorët, profesionistët dhe bizneset tona lëvizin çdo ditë mes Kosovës dhe Maqedonisë së Veriut. Vetëm përmes pikës doganore në Han të Elezit kalojnë rreth 54 mijë maune në vit, apo rreth 150 maune në ditë. Prandaj, çdo kilometër i ri rrugë që na afron është investim në jetën e qytetarëve tanë dhe në zhvillimin ekonomik të të dyja vendeve. Kjo autostradë do ta bëjë këtë qarkullim më të shpejtë, më të sigurt e më efikas”, tha ai.

Kryeministri shtoi se autostrada ka rëndësi strategjike, ndërsa përmendi edhe linjën 10 hekurudhore dhe projektin e përbashkët për rrugën Prizren – Tetovë.