Kurti: Cep më cep PodujeVVa për 118

Kryeministri dhe lideri i LV-së, Albin Kurti ka mbajtur tubim zgjedhor në Podujevë.

Ai mes brohoritjesh nga qytetarët, tha se kësaj radhe do të thyhet përsëri rekordi i votimit të Lëvizjes VETËVENDOSJE! më 9 shkurt, duke theksuar se katër ditët e mbetura janë vendimtare për më shumë se vetëm katër vitet e ardhshme, sepse më 9 shkurt vendoset gjykimi popullor për rrugën e drejtë, të mirë e të mbarë që kemi ndjekur deri tani dhe po ashtu na jepet leja demokratike për katër vitet e ardhshme për edhe më shumë punë të mira e të mbara për të gjithë qytetarët e Republikës së Kosovës cep më cep shoqërisë e territorit tonë.

Kryeministri Kurti mes rikujtimit të punëve të mira në ekonomi, siguri, drejtësi e progresin socio-ekonomik u fokusua në zotimet në mandatin e ardhshëm ku do të qeverisim edhe për katër vitet e ardhshme.

“66% e kemi rritë buxhetin për polici, e kemi dyfishuar numrin e ushtarëve, e kemi trefishuar buxhetin për ministrinë e mbrojtjes, e kemi katërfishuar numrin e trajnimeve të ushtarakëve tanë jashtë vendin dhe e kemi qindfishuar buxhetin për armatim e për municion, ku kemi blerë drona Bajraktar luftarak TB2 nga Turqia, kemi blerë sistemin antitank Javelin amerikan, po blejmë helikopterë Black Hawk nga Shtetet e Bashkuara të Amerikës, do ta kemi edhe fabrikën tonë të municionit e pas blerjes së dronëve edhe do ti prodhojmë dronët Made in Kosova, cep më cep do ta mbrojmë vendin tonë për çfarëdo çmimi e me cdo kusht, e në mandatin e ri do ta shtojmë edhe për 50% buxhetin për ushtrinë tonë. E kemi pasur 626 milion gjithsej në këto katër vite, do ta bëjmë së paku 1 miliard euro buxhetin për Forcën e Sigurisë së Kosovës.”

“Do ti ndërtojmë 5 diga si akumuluese të ujit dhe prej këtyre 5 digave njëra prej tyre do të jetë ajo e Pollatës.”

“Rruga Prishtinë – Podujevë do të përfundojë në këtë pranverë e do të përfundojnë edhe rrugët Prizren – Tetovë, autostrada Prishtinë – Gjilan deri të Dheu i bardhë, rrugët Dollc – Gjakovë, Kiev – Zahaq dhe Duhël – Shtime – Banullë, pra do ti lidhim të gjitha vendbanimet me rrugë të mira, të shpejta, e jo me shpronësime të shtrenjtatë cilat i lënë rrugët e pakryera.”

“Të dashur qytetarë për shkak se ne jemi qeveri për fëmijë, qeveri për nëna, qeveri për gra, qeveri për pleqë, qeveri për pensionista, qeveri edhe për invalidët e UÇK-së, veteranët e UÇK-së që kanë marrë tash 20% rritje dhe po e ndreqim pabarazinë sepse në të kaluarën për për dëshmorin e dytë, për të zhdukurin e dytë në familjë është rritur në mënyrë minore pensioni. Ajo që ka qenë 20%, 30%, 40% ne e kemi bërë 50%, 100%, 150% sepse nuk ka dëshmor e të zhdukur më pak të vlefshëm. Ne kurrë nuk e harrojmë që shtetin që po e forcojmë i ka themelet në gjakun e dëshmorëve të Ushtrisë Clirimtare të Kosovës dhe martirëve të kombit tonë, ndërkaq muret edhe kulmin jemi duke i bërë gjithnjë e më të forta e më të sigurta për një ardhmëri të brezave të ardhshëm.”

“Do të kemi edhe prokurori të re speciale kundër krimit të organizuar dhe kundër korrupsionit. Byroja për konfiskimin e pasurisë së pajustifikueshme do të bëhet se s’bën. Cent më cent do ti kthejnë paret e plackitura e të vjedhura cep më cep Kosovës. Punësimin kemi me bë nëpërmjet sistemit dual, duke e lidhur arsimin me punën profesionale”.

“Pastaj programi ‘superpuna për gratë’: kudo që punësohen gratë nëpër ndërmarrje private, ne do t’ia japim për 6 muaj shtesë nivelin e pagës minimale që është 350 euro aktualisht, ka qenë 130 e 170, e mandatin e ardhshëm do ta bëjmë mbi 500 euro pagën minimale. Do ta realizojmë programin “gjenerata për gjeneratë” që nënkupton 100 euro shtesë mbi pensionin ekzistues për gjeneratën e pleqëve tanë, gjysheve e gjyshërve që do të kujdesen për fëmijët prej moshës 1-3 vjeç kur të dy prindërit ju punojnë atyre”, ka theksuar Kurti.

“Do ta kemi programin “mobiliteti për studentët” i cili i mbështetë studentët në nevojë çdo muaj varësisht nga distance ku studiojnë. Sa më larg që studion një studente a një student prej vendbanimit e vendlindjes së vet, aq më shumë do ta mbështesim si shtet, e gjithashtu do të ketë bursa në studentët që vijojnë studimet në shkollimin jo universitar e jo publik. Sepse nga studentët tanë varet cilësia e punëtorëve tonë në ekonominë tonë”.

“Po ashtu edhe projekti për transportin publik “Anembanë” ku me 10 euro në muaj qytetarët do të kenë mundësi të udhëtojnë kudo nëpër Kosovë. 1 miliardë euro mbështetje në kapacitet prodhuese përmes garantimit të kredive për investitorët, heqjen e taksës doganore prej 10% për veturat nga BE-ja, edhe më shumë përkrahje për bujqësinë sesa mandatin e parë, së paku 1 miliard euro për ushtrinë e Republikës së Kosovës e pika tjera programore që do ta ngrisin kualitetin e jetës së qytetarëve”, theksoi Kurti.

Fjalimi përfundoi duke prezantuar kandidatët e Podujevës të cilët e mbajtën nga një fjalë rasti: Drita Pajaziti, Fitim Haziri, Driton Hyseni, Hamdi Jaha, Shuajb Blakçori, Vendenis Lahu, Saranda Bogujevci.

Në fund, Kryeministri Albin Kurti para qytetarëve llapjan bëri thirrje që në ditët e mbetura secili prej nesh të angazhohet maksimalisht në familje, shoqëri e rrethet shoqërore të tjera që të bindin sa më shumë qytetarë që me 9 shkurt të dalin në zgjedhje, të votojnë Lëvizjen VETËVENDOSJE! e të bëhen bashkë 500 mijë zemra për të festuar fitoren më të madhe parlamentare ndonjëherë në Republikën e Kosovës e kosovën e çliruar.