​Krimet e luftës, Çeku: Do të vazhdojmë betejën për dëmshpërblim nga Serbia

Ministri i Kulturës, Hajrulla Çeku, ka dorëzuar sot raportin e dokumentimit mbi krimet e luftës në Kosovë, Institutit për Dokumentimin e Krimeve të Luftës.

Ky raport është rezultat i punës së Komisionit shtetëror të formuar nga qeveria për të hetuar dhe dokumentuar krimet e kryera gjatë luftës.

Në një postim në Facebook, ministri Çeku ka theksuar vendosmërinë për të vazhduar betejën për drejtësi dhe dëmshpërblim ndaj Serbisë. Ai ka vënë theksin mbi dëmet që trashëgimia kulturore e Kosovës ka pësuar si pasojë e “projektit gjenocidal serb”, duke e cilësuar këtë si një akt kulturocidi me pasoja tronditëse.

Sipas raportit të publikuar nga Çeku, 1784 monumente janë shkatërruar, 3724 artifakte janë grabitur, 175 biblioteka janë djegur ose shkatërruar, dhe 1.7 milion libra në gjuhën shqipe janë asgjësuar.

Gjithashtu, mijëra dokumente arkivore të monumenteve janë grabitur dhe qindra vepra arti janë dëmtuar ose vjedhur gjatë luftës në Kosovë.

Ministri ka premtuar se përpjekjet për të ndriçuar të vërtetën dhe për të kërkuar drejtësi nuk do të ndalen.

Postimi i plotë:

Gjatë luftës, krahas krimeve të shumta të luftës, projekti gjenocidal serb kishte shënjestruar edhe trashëgiminë kulturore të Kosovës. Kulturocidi serb në Kosovë ishte me pasoja tronditëse. 1784 monumente të shkatërruara, 3724 artifakte të grabitura, 175 biblioteka të shkatërruara, 1.7 milion libra shqip të asgjësuar, dhjetëra mijëra dokumente arkivore të monumenteve të grabitura, qindra vepra arti të dëmtuara e vjedhura.
Raportin e dokumentimit me këto të gjetura dhe rekomandimet për veprimet e mëtejme ia dorëzuam Institutit për Dokumentimin e Krimeve të Luftës. Raporti është rezultat i punës së Komisionit shtetëror të emëruar nga Qeveria, me anëtarë nga institucionet shtetërore dhe profesionale.
Nuk do të ndalemi për asnjë moment në betejën tonë për drejtësi e dëmshpërblim karshi Serbisë.