Këshilli Prokurorial i Kosovës (KPK) në mbledhjen e mbajtur të hënën ka shpallur konkursin për zgjedhjen e Kryeprokurorit të Shtetit.

Shpallja e këtij konkursi është bërë me pesë vota për, një kundër dhe asnjë abstenim.

U.d. presidentja Albulena Haxhiu, ka përshëndetur shpalljen e konkursit për Kryeprokuror të Shtetit.

Ajo ka thënë se ky veprim i Këshillit Prokurorial të Kosovës rikthen mundësinë për një proces të rregullt, transparent dhe të bazuar në meritë.

“Është me rëndësi që i gjithë procesi të zhvillohet në mënyrë të paanshme, të besueshme dhe larg çdo ndikimi politik apo interesi të ngushtë, në mënyrë që në krye të Prokurorisë së Shtetit të zgjidhet kandidati më kompetent dhe me integritet të lartë profesional. Besimi i qytetarëve në sistemin e drejtësisë ndërtohet pikërisht përmes proceseve të drejta, transparente dhe të bazuara në meritokraci”, ka thënë Haxhiu.