Oda Ekonomike e Kosovës dhe Cacttus kanë nënshkruar dokumentin e dorëzim-pranimit, duke shënuar përmbylljen me sukses të zhvillimit të platformës online për lidhjen e bizneseve të Kosovës me bizneset e Diasporës.

Platforma krijon një hapësirë të centralizuar dhe profesionale ku bizneset mund të prezantojnë produktet dhe shërbimet e tyre, të gjejnë partnerë potencialë dhe të krijojnë kontakte të drejtpërdrejta për bashkëpunim.

Përmes saj do të mundësohet edhe organizimi i takimeve biznesore, promovimi i ngjarjeve dhe misioneve tregtare, publikimi i tenderëve dhe qasja në informata të rëndësishme për bizneset.

Synimi i OEK-ut është i qartë: ta kthejë këtë platformë në një adresë të besueshme për bashkëpunimin ekonomik Kosovë–Diasporë, duke krijuar më shumë mundësi për investime, partneritete, eksport dhe ndërkombëtarizim të bizneseve kosovare.

Ky projekt është zhvilluar në kuadër të HOME – Holistic Opportunities for Migrant and Diaspora Engagement, i zbatuar nga Caritasi Zviceran, me mbështetjen financiare të Qeverisë së Principatës së Lihtenshtajnit.