Kombëtarja e Kosovës në konkurrencën e vajzave ka mësuar kundërshtarin e saj për fazën “Play-Off” të kualifikimeve për Kampionatin Botëror të Vajzave, që do të mbahet në Brazil në vitin 2027.

Sipas shortit të hedhur, vashat e Kosovës në muajin tetor do të përballen me Austrinë në kuadër të rundit të parë të fazës “Play-Off”.

Nëse arrijnë të sigurojnë fitore ndaj Austrisë, futbollistet kosovare do të avancojnë në rundin e dytë, i cili do të zhvillohet në muajin dhjetor.

Aty, Kosova do të ndeshet me fituesin e sfidës ndërmjet Izraelit dhe Zvicrës.

Ky paraqet një moment të rëndësishëm për Kombëtaren e Kosovës, e cila synon të vazhdojë rrugëtimin historik drejt kualifikimit në Kampionatin Botëror të Vajzave “Brazil 2027”.

Federata e Futbollit e Kosovës u ka uruar shumë suksese vashave në këtë sfidë të rëndësishme drejt realizimit të ëndrrës botërore.