Kombëtarja e Kosovës ka zhvilluar sot stërvitjen e radhës në kuadër të përgatitjeve për ndeshjen e nesërme kundër Austrisë, e cila do të zhvillohet në Vjenë.

Në seancën e sotme, Albian Hajdari dhe Edon Zhegrova janë stërvitur të diferencuar nga pjesa tjetër e ekipit, duke zhvilluar vrapime të lehta për shkak të shqetësimeve të paraqitura nga ndeshja e kaluar.

Ndërkohë, pjesa tjetër e futbollistëve ka zhvilluar stërvitjen me intensitet të plotë, nën drejtimin e përzgjedhësit Franco Foda dhe stafit të tij.

Fokusi kryesor i seancës ishte te përgatitjet taktike, me stafin teknik që punoi me futbollistët në detajet e planit të lojës dhe mënyrën se si Dardanët synojnë ta përballojnë sfidën ndaj Austrisë.

Kosova tashmë është e fokusuar plotësisht në ndeshjen e nesërme, me synim një paraqitje sa më të mirë në Vjenë.