Konjufca shkon në familjen e Enver Zymerit dhe Afrim Bunjakut

Duke bërë homazhe pranë pllakës përkujtimore kushtuar zyrtarëve të rënë policorë, ai ka shprehur vlerësimin e lartë ndaj aktit heroik të policëve tanë që dhanë jetën duke i shërbyer në mënyrë të pashoq shtetit dhe qytetarëve tanë, me përpjekjen e tyre sublime për të mbrojtur rendin ligjor e kushtetues, në luftën kundër cënimit të integritetit territorial dhe sovranitetit të vendit tonë, si dhe kundër krimit të organizuar.

Po ashtu, ai u bëri vizitë në familjet e dy heronjëve tanë, të Enver Zymerit dhe Afrim Bunjakut, të cilët me guximin dhe vendosmërinë e tyre, me dashurinë ndaj atdheut dhe përgjegjësinë e lartë ndaj detyrës sakrifikuan jetën e tyre duke mbrojtur sovranitetin dhe ligjshmërinë e Republikës së Kosovës, që u kërcënuan nga strukturat kriminale dhe forcat paramilitare të dirigjuara prej Serbisë.

“Kjo ditë e përkujtimit të heronjve tanë policorë shënohet në datën e rënies së Enver Zymerit, i cili vdiq më 26 korrik të vitit 2011 pasi ishte qëlluar me armë nga strukturat kriminale të Serbisë, në operacionin për të shtrirë kontrollin shtetëror në pikat kufitare. Homazhet i vijuam pikërisht aty ku gjendet pllaka përkujtimore për nder të tij, në vendin ku ai ra heroikisht”.

“Sakrifica sublime e të gjithë zyrtarëve tanë policorë të rënë në detyrë i bën ata heronj të shtetit tonë, ndërsa ne na bën të përkulemi përballë këtij shembulli të dinjitetit dhe përkushtimit, që do të na frymëzojë të gjithëve ne dhe brezat që do të vijnë, për të na kujtuar se jeta jonë bëhet gjithnjë e më e plotë kur ajo është në shërbim të forcimit të atdheut, e jetët e dhëna për të janë jetë të përjetshme, siç është atdheu ynë. Lavdi të gjithë policëve tanë që dhanë jetën e tyre në mbrojtje të shtetit tonë! U përkujtofshin me admirim dhe respekt përjetësisht!”, ka deklaruar Konjufca.