Komisionerja për Zgjerim: Shqipëria mbyll negociatat me BE-në në vitin 2027

Komisionerja Evropiane për Zgjerim, Marta Kos është shprehur sërish me nota pozitive për integrimin e Shqipërisë në Bashkimin Evropian.

Në një intervistë për Radio Televizionin Slloven, ajo ka deklaruar se Shqipëria në vitin 2027 do të mbyllë procesin e negociatave.

“Dy shtete nga Ballkani Perëndimor janë në pararojë të procesit të anëtarësimit në BE. Mali i Zi që renditet në krye, vend me të cilin negociatat mund të përfundojnë deri në fund të vitit 2026. Shqipëria është në vendin e dytë dhe besoj se mund të kalojë vijën e finishit për t’i mbyllur negociatat në fund të vitit 2027”.

“Vendimi përfundimtar do të merret nga shtetet anëtare të BE-së. Jam e vetëdijshme për rëndësinë e jashtëzakonshme të komunikimit sepse nuk mund ta imagjinoj që pasi të kenë përfunduar të gjitha negociatat, shteti anëtar do të thoshte jo, ne nuk e duam atë vend në Bashkimin Evropian, prandaj jam optimiste për të dyja shtetet pararojë, Shqipërinë dhe Malin e Zi”, u shpreh Marta Kos. /tvklan