Klubi italian Venezia, i cili këtë sezon do të garojë në Serie A pas sigurimit të promovimit në elitën e futbollit italian, ka nisur lëvizjet për përforcimin e skuadrës, me fokus të veçantë në repartin ofensiv.

Mes emrave që po shqyrtohen nga drejtuesit e klubit italian është edhe sulmuesi i Kombëtares së Kosovës, Albion Rrahmani, i cili aktualisht aktivizohet te Sparta Praga dhe konsiderohet një nga futbollistët më premtues të gjeneratës së tij, transmeton Klankosova.tv.

Sipas raportimeve të mediumit italian Sky Sport, Venezia po monitoron nga afër situatën e sulmuesit kosovar të lindur në vitin 2000. Vlera e kartonit të tij vlerësohet rreth 8 milionë euro, ndërsa paraqitjet e tij me klubin çek dhe me Kombëtaren e Kosovës kanë tërhequr vëmendjen e disa skuadrave evropiane.

Përveç Rrahmanit, Venezia po shqyrton edhe alternativa të tjera për fazën e sulmit.

Në listën e klubit italian gjendet edhe Gift Orban, i cili sezonin e kaluar ishte pjesë e Veronës, ndërsa drejtuesit po punojnë gjithashtu për mundësinë e transferimit të sulmuesit gjerman Niclas Fullkrug.

Raporti thekson se Venezia tashmë ka nisur kontaktet e para për të mësuar më shumë rreth mundësisë së transferimit të Albion Rrahmanit.

Megjithatë, transmeton klankosova.tv klubi italian nuk është i vetmi që po ndjek zhvillimet rreth sulmuesit nga Podujeva, pasi interesim për të kanë shfaqur edhe skuadra të tjera.

Albion Rrahmani vazhdon të mbetet një nga emrat më të përfolur të futbollit kosovar në merkato, ndërsa mbetet të shihet nëse interesimi i Venezias do të konkretizohet në një ofertë zyrtare gjatë javëve të ardhshme.