Antonio Conte do të largohet nga Napoli në fund të këtij sezoni, pavarësisht suksesit të madh me klubin napolitan.
Sipas raportimeve nga Italia, trajneri italian e kishte informuar presidentin Aurelio De Laurentiis që para një muaji për vendimin e tij, ndërsa tashmë gjithçka konsiderohet e mbyllur.
Conte do të largohet pa dëmshpërblim dhe pa ndonjë marrëveshje paraprake me një klub tjetër. Raportohet se ndarja mes palëve po bëhet në mënyrë të qetë dhe me raporte shumë të mira mes trajnerit dhe presidentit të Napolit.
Trajneri italian nuk ka diskutuar fare projekt të ri me klubin, duke treguar se ishte gati për një kapitull tjetër në karrierë.
Conte e mbyll aventurën te Napoli pasi fitoi titullin e Serie A dhe Superkupën e Italisë, ndërsa emri i tij tashmë përmendet edhe si kandidat potencial për stolin e Kombëtares së Italisë.