I vazhdohet paraburgimi Ilir Avdullahut – të akuzuarit për përfshirje në vrasjen e Triumf Rizës
Të akuzuarit për përfshirje në vrasjen e policit Triumf Riza, Ilir Avdullahut i njohur me nofkën “Liza”, i është vazhduar paraburgimi për dy muaj.
Kështu ka konfirmuar zëdhënësja e Gjykatës Themelore të Prishtinës, Mirlinda Gashi, në një përgjigje për Klankosova.tv.
“Pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurit I.A, Gjykata Themelore në Prishtinë – Departamenti Special me datë 29.07.2024 ka marr Aktvendim dhe duke aprovuar kërkesën e Prokurorisë Speciale të Republikës së Kosovës, ashtu që masa e paraburgimit të pandehurit I.A iu është vazhduar në kohëzgjatje prej 2 (dy) muaj”, shkruan në përgjigjen e saj.
Riza u vra në vitin 2007, ndërsa Avdullahu u arrestua pas 15 vjetësh në Batllavë të Podujevës për përfshirje në vrasjen e ndodhur.
Si shtytës për vrasjen u dënua me 25 vjet burgim Enver Sekiraqa i cili ndodhet në arrati, ndërsa Arben Berisha u dënua me 35 vjet si dorasi që kreu veprën penale.