Kryetarja e Kuvendit të Republikës së Kosovës, Albulena Haxhiu, bashkë me Kryeministrin Albin Kurti, ish-deputetë, veprimtarë dhe bashkëpunëtorë, bëri homazhe në Gllobar, Vërbicë dhe Shtuticë të Drenicës, në kujtim të 276 civilëve shqiptarë të pafajshëm që u vranë dhe u masakruan në këto fshatra dhe në fshatra të tjera përreth, më 30 prill 1999.

Gjithashtu kryetarja Haxhiu vendosi lule të freskëta në Kompleksin Memorial të Dëshmorëve në Marinë të Skenderajt, në nderim të 42 dëshmorëve të Ushtrisë Çlirimtare të Kosovës nga Brigada 114 “Fehmi Lladrovci”, të cilët, në krye me komandantin dhe heroin Ilaz Kodra, ranë po atë ditë, më 30 prill, në mbrojtje të popullsisë civile nga sulmi i egër dhe gjenocidal i forcave serbe.

“Përkulemi me respekt para dëshmorëve dhe martirëve tanë, që dhanë gjithçka nga vetja që ne ta gëzojmë lirinë. Është falë tyre që ne ia dimë edhe kuptimin, edhe vlerën lirisë. Lavdi e përjetshme për dëshmorët dhe martirët e kombit tonë”, theksoi kryetarja Haxhiu.