Haxhiu: Minatorët që 3 muaj pa paga, Kurti ka shkelur mbi djersën e tyre

Deputeti nga radhët e Partisë Demokratike të Kosovës [PDK], Bekim Haxhiu, ka kritikuar Qeverinë për “keqmenaxhimin dhe keqpërdorimet” në Trepçë, pasi tre muaj minatorët janë pa pagë dhe se ai ka shkelur mbi ndjersën e tyre.

Haxhiu, përmes një postimi në rrjetin social “Facebook”, ka shkruar se kur minatorët hyjnë në grevë, Kurti duhet të ulet dhe të diskutojë për kërkesat e tyre dhe për të gjetur një zgjidhje.

“Albin Kurti dhe LVV-ja premtuan 450 milionë euro investime në Trepçë. Qeveria e tij nuk po i paguajn as pagat për minatorët dhe punëtorët e Trepçës. – Mosinvestimi në Trepçë është krim – pati deklaruar Kurti. Deklaratë farse, mashtrimi i radhës, ngase për afro 4 vite në qeverisje nuk ka realizuar asnjë investim në Trepçë”, vijoi Haxhiu.

Haxhiu deklaroi se Kurti vazhdimisht i ka shpërfillur kërkesat e minatorëve dhe se ka shkelur mbi ndjersën e tyre.

“Minatorët janë pa paga tash e 3 muaj, si pasojë e keqmenaxhimit dhe keqpërdorimit në Trepçë. Kërkesat e minatorëve në vazhdimësi i ka shperfillur, ka shkelur mbi djersën e tyre. Nuk i mjaftuan 4 vite qeverisje për të zgjidhur një problem të vetëm të punëtorëve. Vetëm fjalë boshe, mashtrime, keqpërdorim i buxhetit për shetitje, dreka e darka”, vijoi tutje.

“Albin Kurti dhe LVV as edhe një premtim s’e kanë përmbushur për 4 vite qeverisje.

Kur minatorët hyjnë në grevë çdo qeveritar i përgjegjshëm do të duhej të ulej me minatorët në minierë, t’i dëgjojë kërkesat e tyre për të gjetur zgjidhje.

Sigurisht, Albin Kurti në kohë të fushatës elektorale do t’i vizitojë minatorët në përpjekje për t’i mashtruar sërish”, thuhet tutje.