Ish-kryetari i AAK-së dhe ish-kryeministri Ramush Haradinaj, ka thënë se opozita nuk ka arritur të krijojë një marrëveshje të përbashkët politike dhe një kandidat të përbashkët, duke vlerësuar se, në këto rrethana, vendi do të vazhdojë të udhëhiqet nga agjenda e Lëvizjes Vetëvendosje dhe e kryeministrit në detyrë, Albin Kurti.

Haradinaj ka theksuar se vetëm një bashkim i opozitës, me një kontratë të qartë politike dhe me një kandidat të përbashkët për president, mund ta ndryshojë situatën aktuale politike në vend.

“Ne po jetojmë në epokën Kurti, që i bie se ai, kur i ka 40% ose mbi 40 deputetë, do ta zbatojë agjendën e tij në Kosovë. Ndikimi ynë, ose ne do të mund të mos jetonim vetëm në epokën e tij, por edhe në epokën e të tjerëve, sikur të kishim një kontratë të përbashkët si opozitë. Pra, AAK-ja, LDK-ja dhe PDK-ja, edhe një plan konkret, një kandidaturë konkrete”, është shprehur Haradinaj.

Sipas tij, mungesa e një alternative të organizuar opozitare po i jep mundësi Kurtit të vazhdojë me politikat e tij dhe ta çojë vendin sërish në zgjedhje.

“Përderisa nuk kemi një kontratë dhe nuk kemi një ofertë, ne jetojmë në epokën Kurti, në agjendën Kurti dhe ai do ta zbatojë atë që di më së miri, një lloj eksperimentimi me Kosovën, dhe do të na dërgojë në zgjedhje prapë. Pra, kjo është ajo që di dhe ajo që po ndodh. Nga përvoja ime e gjatë politike, unë po e lexoj këtë”, ka thënë ai.