Hamza: PDK-ja s’hyn në asnjë koalicion me LV-në, opozita do ta formojë qeverinë

Kandidati i PDK-së për kryeministër, Bedri Hamza, në një konferencë për medie, ka thënë se nuk do të hyjnë në koalicion me LV-në, teksa shtoi se do të punojnë për t’ia dhënë qytetarëve “qeverinë për të cilën kanë votuar shumica”. “Sot është një ditë më ndryshe se dje, vullneti juaj u shpreh qartë dje. LV-ja ka humbur një numër të madh të votave, shumë qytetarë që e kanë votuar në të kaluarën tashmë veç ia kanë kthyer shpinën, ata erdhën kryesisht në PDK dhe në LDK. Kryeministri në detyrë i paraqiti këto zgjedhje si një referendum për vete dhe qeverinë e tij, por qëllimi nuk u arrit. Ai kërkoi 500 mijë vota por nuk i mori, nuk ia dhanë qytetarët. Sot shumica e qytetarëve që votuan nuk duan që e njëjta qeveri të vazhdojë, qytetarët me vullnetin e tyre i kanë besuar opozitës prandaj në këto zgjedhje i kanë fuqizuar partitë opozitare. Kjo më obligon mua dhe PDK-në, si partia më e madhe opozitare, që të sillem në mënyrë të përgjegjshme për ta respektuar vullnetin e shumicës shqiptare për ndryshim. Ne nuk do të përfshihemi në asnjë koalicion me LV-në, kemi dallime të mëdha, ata duan pushtet absolut, s’kanë as program dhe gjatë fushatës ikën nga ballafaqimi edhe në studiot televizive. Ata i ofenduan kundërshtarët politikë, edhe me këtë edhe qytetarët”, ka deklaruar Hamza, duke shtuar se e kanë detyrim dhe përgjegjësi t’ia japim qytetarëve qeverinë që ata duan dhe që e kanë votuar.