Hamza: Do ta themelojmë Fondin e Papunësisë dhe Gjykatën e Punës

Kryetari dhe kandidati për kryeministër i Partisë Demokratike të Kosovës, Bedri Hamza ka qëndruar në Malishevë, ku ka thënë se programi i tij ofron zgjidhje reale, të llogaritura dhe të financuara qartë.

Hamza, në një tubim, në mesin e qytetarëve të Malishevës dhe përkrahësve të PDK-së atje, ka theksuar se programi i tij bazohet në katër shtylla: zhvillim ekonomik dhe mirëqenie, arsim dhe shëndetësi, drejtësi dhe mbrojtje e politikë e jashtme.

Hamza ka thënë së punëtori do të jetë në qendër të politikave të qeverisë së udhëhequr nga ai, prandaj do ta themelojnë Fondin e Papunësisë dhe Gjykatën e Punës.

Ai u ka bërë thirrje qytetarëve që më 28 dhjetor ta votojnë PDK-në dhe numrin 130. “Vota për PDK-në shkon në numrin 130. Kjo është adresa, nuk ka adresë tjetër. Prandaj, fitorja e PDK-së, ju gëzon juve, më gëzon mua, por të jeni të bindur që i gëzon dhe i bën krenarë Hashim Thaçin dhe Kadri Veselin”, ka shtuar ai.

Tutje, kandidati i PDK-së për kryeministër, Bedri Hamza ka marrë pjesë në një tubim tjetër në lagjen Kalabria në Prishtinë, ku tha se bashkimi i qytetarëve rreth vizionit të PDK-së për zhvillim, stabilitet dhe mirëqenie është frymëzues.