Haga i heq kufizimet ndaj Thaçit dhe të tjerëve për vizitat
Dhomat e Specializuara i kanë hequr kufizimet ndaj ish-krerëve të lartë të UÇK-së, Hashim Thaçi, Kadri Veseli, Rexhep Selimi dhe Jakup Krasniqit, rreth vizitave private.
Në njoftimin e publikuar më 9 shkurt, gjyqtari Charles Smith III, iu ka kujtuar atyre e në veçanti ish-presidentit të Kosovës Thaçi dhe ish-deputetit Selimi, rreth detyrimit që kanë për mos zbuluar informacione konfidenciale personave të tretë.
“Për arsyet e lartpërmendura, Paneli përmes kësaj: KUJTON të Akuzuarit, në veçanti, zotërinjtë Thaҫi dhe Selimi, për detyrimin e tyre për të mos zbuluar palëve të treta të paautorizuara asnjë informacion konfidencial dhe/ose informacion që mund të çojë në identifikimin e dëshmitarëve të mbrojtur; UDHËRON Sekretarin që t’u kujtojë vizitorëve në objektet e paraburgimit se ata nuk duhet të diskutojnë ose të marrin pjesë në diskutimet e informacioneve konfidenciale që kanë të bëjnë me procedurat në KSK me një të paraburgosur, duke përfshirë informacionin që ka të bëjë me identitetin e dëshmitarëve të mbrojtur”, thuhet në këtë vendim.
Tutje, në arsyetimin e këtij vendimi thuhet se Paneli refuzoi që të vendoste ndonjë masë kufizuese lidhur me vizitat private.
“Andaj, ka vlerësuar se nuk ka indikacione që këto vizita të jenë përdorur për qëllime tjera”, thuhet tutje në vendim.
Po ashtu lidhur me kërkesën e Zyrës së Prokurorit të Specializuar, që të gjitha vizitat private të Thaçit dhe Selimit të monitorohen, ky paneli ka theksuar se ato janë të rëndësishme sa i takon të drejtave të akuzuarve si dhe nuk ka bazë për të vendosur masa kufizuese ndaj tyre.
Ndaj, Thaçit dhe të tjerëve DHSK-ja më 1 dhjetor 2023 pati caktuar kufizime.
Vendimin e plotë mund ta gjeni KËTU