Kryesia e Aleancës ka mbajtur sot mbledhjen e radhës, të parën pas vendimit të Gjykatës Speciale në Hagë dhe pak ditë para përfundimit të afatit për zgjedhjen e presidentit të Kosovës.

Kryetari i saj, Ardian Gjini, ka thënë se Aleanca vazhdon të ketë qëndrim të prerë sa i përket Gjykatës Speciale, ndërsa ka kërkuar që procesi i ndihmës ligjore për krerët e UÇK-së në Hagë dhe mbrojtja e të drejtave shtetërore të Kosovës të mos përzihen me politika partiake.

Gjini ka shprehur shqetësimin edhe për zvarritjen e procesit për zgjedhjen e presidentit, duke thënë se afrimi i fundit të afatit të përcaktuar nga Gjykata Kushtetuese, si dhe, sipas tij, tendencat për manovra me afate dhe lëndë të reja në Kushtetuese, mund të krijojnë paqartësi të mëtejshme për qytetarët.

“Aleanca ka qenë konsistente dhe konstruktive për çdo çështje që lidhet me historinë tonë, me të sotmen dhe me të ardhmen e fëmijëve tanë”, ka deklaruar Gjini.

Ai ka theksuar se Aleanca do të vazhdojë angazhimin politik për, siç është shprehur, mbrojtjen e rendit kushtetues, rikthimin e normalitetit institucional dhe zhvillimin ekonomik e social të vendit.