“Fuqizimi i të rinjve dhe krijimi i mundësive të reja për zhvillim profesional në Kryeqytet ishin në qendër të takimit me Ambasadorin e Italisë në Kosovë, z. Maurizio Antonini”, ka shkruar në ‘Facebook’ kryetari i Prishtinës, Përparim Rama.

“Diskutuam për krijimin e Inkubatorit të Bizneseve në Prishtinë, një hapësirë që do të lidhë arsimin profesional me tregun e punës, duke mbështetur inovacionin dhe aftësimin e të rinjve”, ka njoftuar Rama.

Ai ka treguar se pjesë e bashkëpunimit ishte edhe avancimi i edukimit parashkollor përmes qasjes “Reggio Emilia”, si dhe zhvillimi i iniciativave kreative që promovojnë mësimin inovativ, kreativitetin dhe qëndrueshmërinë në shkolla.

“Vazhdojmë të ndërtojmë partneritete që sjellin mundësi reale për gjeneratat e reja”, ka shkruar Rama.