Akademia e Talenteve e FIFA-s në Kosovë shënoi një moment historik për zhvillimin e futbollit në vend, shkruan në faqet e saj zyrtare në rrjetet sociale FIFA.

“FIFA Talent Academy Kosovë, në kampin kombëtar të Federatës së Futbollit të Kosovës (FFK) në Hajvali, festoi një ngjarje të rëndësishme, e cilësuar nga zyrtarët si një moment historik për zhvillimin e futbollit në Kosovë”.

“Kjo akademi është e para e këtij lloji në Ballkan dhe një nga vetëm katër Akademitë e Talenteve të FIFA-s aktive në Evropë. Ajo funksionon në kuadër të FIFA-s dhe programit për zhvillimin e talenteve, të udhëhequr nga shefi i zhvillimit global të futbollit në FIFA, Arsène Wenger. Një hap i madh për të ardhmen e futbollit kosovar dhe për gjeneratat e reja të talentuara”, shkruan në Instagram FIFA.

FIFA ka vlerësuar themelimin e Akademisë së Talenteve në Kosovë si një moment historik për zhvillimin e futbollit në vend.
“Akademia, me bazë në Prishtinë, ka nisur funksionimin e plotë në fillim të vitit 2026 dhe zbaton një model të integruar të zhvillimit të talenteve. Lojtarët stërviten katër ditë në javë, ndërsa gjatë fundjavave vazhdojnë të përfaqësojnë klubet e tyre”.

“Një tjetër veçori e rëndësishme është zhvillimi paralel i futbollit të vajzave. FIFA ka bërë të ditur se është themeluar edhe Akademia e Talenteve të FIFA-s për vajza, duke reflektuar përkushtimin e Federatës së Futbollit të Kosovës për krijimin e mundësive të barabarta në zhvillimin e talenteve”, shkruan FIFA.

FIFA e ka cilësuar këtë si “një moment historik për zhvillimin e futbollit të Kosovës”.

Tutje FIFA ka paraqitur edhe deklaratën e presidentit të FFK-së, Agim Ademi.

“Në kuadër të këtij projekti, presidenti i FFK-së, Agim Ademi, ka shprehur mirënjohje për FIFA-n për besimin dhe mbështetjen e vazhdueshme ndaj Federatës së Futbollit të Kosovës. ‘Në këtë ditë të rëndësishme, dëshiroj të shpreh mirënjohjen time të veçantë për FIFA-n për besimin dhe mbështetjen e vazhdueshme që i ka dhënë Federatës së Futbollit të Kosovës’ ”, ka deklaruar Ademi, shkruan FIFA.