FC Mitrovica e ka mbyllur me suksee sezonin 2025/2026 duke fituar titullin e kampionit në Ligën e Dytë dhe njëherësh duke e siguruar inkuadrimin në Ligën e Parë.
Në ndeshjen e fundit të luajtur sot në stadiumin “Xhevat Jusufi”, skuadra mitrovicase e mposhti Podujevën, me rezultat 4:1. Kësisoj tashmë ky qytet do t’i ketë tri skuadra në Ligën e Parë. Me këtë fitore, klubi mitrovicas konfirmoi dominimin gjatë sezonit dhe rikthimin në një nivel më të lartë të garave në futbollin kosovar.
Pas përfundimit të ndeshjes, trofeu i kampionit iu dorëzua nga anëtari i KE i FFK-së, Xhelal Broja i cili në emër të Federatës së Futbollit të Kosovës, e ka përgëzuar FC Mitrovicën për suksesin dhe inkuadrimin në Ligën e Parë, duke i uruar klubit suksese në sezonin e ri dhe vazhdimësi të rezultateve pozitive në gara.
