Elon Musk po lejon edhe përmbajtjet seksuale në platformën X

Rrjeti social X tani lejon zyrtarisht përdoruesit që të shpërndajnë përmbajtje seksuale.

Politika e fundit e aplikuar lejon shpërndarjen e përmbajtjeve seksuale me konsensus, por duhet të etiketohet saktë dhe të mos shënjestrojë fëmijët apo përdoruesit që nuk duan t’i shohin.

“Ne besojmë që përdoruesit duhet të krijojnë, shpërndajnë dhe konsumojnë materiale të lidhura me tema seksuale për sa kohë prodhohet dhe shpërndahet me mirëkuptim. Shprehja seksuale, vizive apo e shkruar, mund të jetë një formë legjitime e shprehjes artistike”, shkruhet në rregulloren e re të përmbajtjes për të rriturit.

Edhe Twitter lejonte përmbajtjet për të rritur, por pa rregullore zyrtare duke i lënë në zonën gri përdoruesit që shpërndanin materiale pornografike. Shumë punonjëse seksi nga platforma e OnlyFans përdornin Twitter për të promovuar punën e tyre.

X thotë se do të ndalojë “shfrytëzimin, objektivizimin, seksualizimin, dëmin ndaj të miturve, sjelljet e pahijshme dhe mosdakordësimin”. “Përdoruesit nuk mund të përdorin materiale pornografike në fotot e profilit ose faqen kryesore të llogarisë”.

“Përmbajtja për të rritur nuk mund të përfshihet në hapësirat që kanë shumë shikueshmëri në X si videot live, fotot e profilit etj”.