Dyvjetori i Marshit për Drejtësi: Jemi në pritjen e kthimit të heronjve tanë në atdhe

Kryetari i PDK-së, Memli Krasniqi, ka përkujtuar sot dyvjetorin e Marshit për Drejtësi, ku shumë qytetarë u mblodhën në Prishtinë për të kërkuar drejtësi për ish-krerët e UÇK-së, të cilët po përballen me një proces gjyqësor në Hagë.

“Dy vite nga Marshi për Drejtësi! Dy vite më parë, rreth njëqind mijë qytetarë u ngritën si një zë i vetëm në Prishtinë për të mbrojtur të vërtetën tonë historike, për të kërkuar drejtësi për Hashim Thaçin, Kadri Veselin, Jakup Krasniqin, Rexhep Selimin dhe shokët e tyre – luftëtarët e lirisë, të cilët sakrifikuan gjithçka për Kosovën. Ishte një ditë e mbushur me krenari, dhembje dhe vendosmëri – sepse kur padrejtësia bëhet ligj, qëndresa bëhet detyrë! Sot, ndërsa kujtojmë atë ditë, jemi më të bashkuar se kurrë në pritjen e kthimit të heronjve tanë në atdhe. Pas një sage të gjatë, besojmë se ata do të kthehen ashtu siç shkuan – të lirë dhe të pafajshëm! Historia nuk rishkruhet, e vërteta nuk mund të ndryshohet dhe lufta e UÇK-së ishte dhe mbetet e drejtë”, ka shkruar Krasniqi në “Facebook”.