Policia e Kosovës ka përmbyllur me sukses të lartë programin dyjavor të shkëmbimit të përvojave dhe praktikës profesionale, në kuadër të bashkëpunimit të shkëlqyeshëm me Universitetin Policor të Brandenburg-ut nga Gjermania.

Nga data 8 deri më 19 qershor 2026, institucioni ynë priti dy zyrtarë policorë nga ky universitet gjerman, duke shënuar një hap shumë të rëndësishëm në konsolidimin e marrëdhënieve akademike dhe trajnuese profesionale ndërmjet dy vendeve.

Ky program shërbeu si një platformë e shkëlqyeshme promovuese për të shfaqur kapacitetet tona të larta institucionale dhe standardet moderne evropiane që Policia e Kosovës reflekton në rrafshin ndërkombëtar.

Gjatë kësaj periudhe, zyrtarët policorë gjermanë realizuan vizita të rëndësishme dhe bashkëbisedime të nivelit të lartë profesional në Departamentin e Njësive Speciale, Departamentin e Hetimeve, Departamentin e Kufirit, Departamentin e Rendit Publik dhe Drejtorinë për Bashkëpunim Ndërkombëtar, ku analizuan nga afër metodologjitë bashkëkohore të policimit operativ dhe strategjik.

Agjenda zyrtare përfshiu gjithashtu një vizitë të veçantë në Ambasadën Gjermane në Prishtinë, si një konfirmim i mbështetjes së ndërsjellë diplomatike dhe bashkëpunimit të palëkundur bilateral në fushën e sigurisë.

Zyrtarët policorë nga Gjermania patën rastin të shohin dhe të vizitojnë edhe vende të kulturës dhe historisë sonë të lavdishme.

Ky proces i rëndësishëm i shkëmbimit akademik dhe taktik u menaxhua me profesionalizëm të lartë nga mentorët e Departamentit të Burimeve Njerëzore/Divizionit të Trajnimeve, duke gëzuar përkrahjen e plotë të autoritetit të drejtorit të Përgjithshëm dhe menaxhmentit të lartë të Policisë së Kosovës.

Përmes këtij suksesi, Policia e Kosovës rikonfirmon përkushtimin e saj të vazhdueshëm për të ardhmen që të thellojë këtë partneritet strategjik me palën gjermane, duke synuar projekte të reja të përbashkëta akademike, shkëmbim të mëtutjeshëm të ekspertizës dhe avancim të vazhdueshëm të standardeve profesionale policore.