Sezoni në Superligën e Zvicrës është mbyllur me paraqitje të jashtëzakonshme nga futbollistët kosovarë. Platforma e njohur për statistika dhe analiza në futboll, Sofascore, ka publikuar formacionin më të mirë të sezonit, ku pjesë e 11-shes ideale janë edhe dy lojtarë nga Kosova.
Portieri i FC Lugano, Amir Saipi, dhe mbrojtësi i FC Sion, Kreshnik Hajrizi, janë përzgjedhur ndër më të mirët e kampionatit falë paraqitjeve stabile gjatë gjithë sezonit.
Saipi u vlerësua me notën e lartë 7.73, duke qenë një nga portierët më të dalluar në elitën zvicerane, ndërsa Hajrizi mori notën 7.19 për kontributin e tij në repartin defensiv të Sionit, raporton KK.
Përfshirja e dy futbollistëve kosovarë në formacionin e sezonit konsiderohet një tjetër dëshmi e rritjes së vazhdueshme të lojtarëve nga Kosova në arenën ndërkombëtare.
