Drita fiton në Drenas, Malisheva ndal Prishtinën

Skuadra e Dritës ka arkëtuar tri pikë të rëndësishme si mysafire në kuadër të xhiros së 27-të të Albi Mall Superligës së Kosovës në futboll, duke e mposhtur Feronikelin 74 në stadiumin “Rexhep Rexhepi” në Drenas, me rezultat minimal 1:0.

Golin e vetëm dhe të fitores për gjilanasit e realizoi Arb Manaj në minutën e 45-të, duke i sjellë Dritës fitoren e 18-të në këtë edicion. Me këtë fitore, Drita forcon pozitën e parë në tabelë me 60 pikë, plot 16 më shumë se ndjekësi më i afërt, Ballkani, duke rrugëtuar e sigurt drejt titullit të kampionit.

Në ndeshjen tjetër të kësaj xhiroje, Malisheva ka shënuar fitore ndaj Prishtinës në stadiumin “Liman Gegaj”.

Skuadra vendase shënoi që në minutën e dytë, kur Donart Vitija realizoi nga brenda zonës për 1:0.

Pavarësisht dominimit në vazhdim të ndeshjes, bardhekaltrit e kryeqytetit nuk arritën ta gjenin golin e barazimit.

Me këtë fitore, Malisheva e ruan pozitën e tretë në tabelë me 44 pikë, derisa Prishtina mbetet në kuotën e 35 pikëve, në pozitën e katërt.