Drejtori i Shëndetësisë në kryeqytet, apelon qytetarët të vaksinohen kundër gripit sezonal

Qytetarët duhet të vaksinohen me vaksinën kundër gripit sezonal, pasi kjo konsiderohet metodë për parandalimin e sëmundjeve infektive.

Kështu po thotë drejtori i Shëndetësisë në Komunën e Prishtinës Izet Sadiku.

Ai gjatë intervistës për Ekonomia Online, tha se më të rrezikuarit janë punëtorët shëndetësor, gratë shtatzëna dhe personat me sëmundje kronike.

Vaksinimi ka filluar më datë 30 shtator dhe jepet në 15 qendrat e mjekësisë familjare në Kryeqytet.

“Po siç e dini që prej 30 shtatorit ka filluar vaksinimi në 15 qendrat mjekësisë familjare në Kryeqytet me vaksina të gripit sezonal, për arsye siç e dini është një sëmundje sezonale i cili tashmë gjatë muajit të dimrit, sidomos në muajin dhjetor e janar kur njerëzit grumbullohen më shumë dhe është një virus që përhapet çdo vit tek njerëzit dhe realisht ne kemi ftuar qytetarët që të vaksinohen”, u shpreh Sadiku.