Deputeti i AAK-së, Daut Haradinaj, ka kritikuar ashpër qeverisjen aktuale në Kosovë, duke pretenduar se vendi është larguar nga Shqipëria dhe se ndikimi i Serbisë brenda Kosovës është rritur.

Përmes një postimi, Haradinaj ka thënë se që nga çlirimi i Kosovës nuk ka pasur, sipas tij, një situatë të tillë, duke e akuzuar qeverinë se po i ngjan gjithnjë e më shumë një “Qeverie Krahinore” nën ndikimin e Beogradit.

“Që nga çlirimi e deri më sot, asnjëherë më parë nuk kemi qenë më larg Shqipërisë, dhe asnjëherë më parë prania dhe ndikimi i Serbisë nuk kanë qenë më të theksuar brenda Kosovës”, ka shkruar Haradinaj.

Ai ka akuzuar pushtetin për dorëzim të sovranitetit ekonomik dhe energjetik, si dhe për shkelje të ligjit dhe Kushtetutës.

Postimi i Haradinajt: 

Që nga çlirimi e deri më sot, asnjëherë më parë nuk kemi qenë më larg Shqipërisë, dhe asnjëherë më parë prania dhe ndikimi i Serbisë nuk kanë qenë më e theksuar brenda Kosovës.

Ky regjim në ikje po i ngjason gjithnjë e më shumë një “Qeverie Krahinore” nën hijen e Beogradit, sesa udhëheqjes së një shteti sovran, të pavarur e dinjitoz.

Kur sovranitetin ekonomik dhe atë energjetik ia dorëzon në duar Vuçiqit, dhe pavarësinë politike e trajton si një leckë duke shkelur ligjin, Kushtetutën e vendit, çfarë mund të pritet më shumë nga këta njerëz?!

Nga këta njerëz që ditën shesin sovranizëm e patriotizëm me fjalë shqip, e natën kurdisin e punojnë për interesat e Serbise – 24/7.

Kjo gjendje do të përfundojë shumë shpejt. Askush nuk është mbi ligjin, e aq më pak mbi Kushtetutën, e me së paku ata që e kanë shndërruar Kosovën në një shtëpi “pa zot shpije”, duke u shërbyer qendrave që synojnë zhbërjen e Kosovës dhe zbehjen e faktorit shqiptar në Ballkan.

Gjithsecili sabotues dhe argat brenda këtij sistemi të dështuar, që thirret rrejshëm në emër të shqiptarisë, një ditë do të japë llogari para ligjit dhe para historisë!

Tashmë marrja ju ka mbuluar. Do të përfundoni aty ku e keni vendin: në faqen më të zezë të mbeturinave të historisë kombëtare!