Çitaku: Kurti i pa rezultatet e politikës së tij shkatërruese e kërkon të kthehet aty ku ishim para tri vitesh

Kryeministri i Kosovës, Albin Kurti ka paraqitur shtatë pikat e Qeverisë së tij për bashkësinë ndërkombëtare në mënyrë që të arrihet normalizim i marrëdhënieve me Serbinë, të cilën Kurti e akuzon për shkelje të zotimeve të dala nga Brukseli e Ohri dhe për sulmin terrorist të 24 shtatorit.

Joseerioze po i konsideron këto pika të paraqitura nga Kurti nënkryetarja e PDK-së, Vlora Çitaku.

Çitaku ka thënë se po bëhet qesharak, teksa e ka quajtur edhe “palaço”. Nënkryetarja e PDK-së thotë se tashmë askush, e as ndërkombëtarët nuk i marrin seriozisht dhe i injorojnë propozimet e Kurtit që i bën tash e sa vjet.

“Kryeministër, je edhe vonë edhe i vonshëm. Askush nuk po të merr seriozisht. Të gjithë, e më së shumti aleatët ndërkombëtarë, i injorojnë fjalimet dhe pikat e tuaja të shumta që propozon tash e sa vjet.
Kosova ende vuan nën sanskione bashkë me Rusinë dhe Bjellorusinë.
Fokusohu, merr vendime, e mos u merr me fjalime dhe postime. Facebooku nuk është mjet adekuat për “face-saving””, shkruan ajo ndër të tjera.

Për çështjen e Asociacionit, Çitaku thotë se pasi i pa rezultatet e politikës së tij të jashtme dhe udhëheqjes që ajo e quan amatoreske, pranimin e një statuti të draftuar nga Lajçak, tani kthehet dhe e sulmon emisarin evropian teksa kërkon që ta draftojë vetë një statut.

“Pasi që përlahet me Lajçak, Borrell dhe gjysmën tjetër të botës, e si pasojë Kosovës i sjell edhe sanksione ndërkombëtare të cilat ende janë në fuqi, në një aksham pazar, pa kurrfarë koordinimi dhe me një paturpësi të pashoq, e pranon një statut të draftuar nga vetë Lajçak, të cilin e quante pro-serb, për autonomi pa njohje të ndërsjellë.

Tash, pasi që i ka parë rezultatet shkatërruese të politikës së tij të jashtme dhe udhëheqjes amatoreske të dialogut, Kryeministri qohet dhe propozon 7 pika dhe kthehet pikërisht aty ku kemi qenë para 3 vitesh, duke thënë se vetë do ta draftojë statutin”, shkruan Çitaku ndër të tjera.

Postimi i plotë:

Kryeministri Kurti i paska postu edhe nja 7 pika të reja: janë joserioze!

Në fakt, ai vet është joserioz. Një palaço jo-qesharak. Qe një kronologji:

1. Për 6-7 vjet, Albin Kurti ka përdorur dhunë kundër çfarëdo marrëveshje të ndihmuar nga aleatët, duke mos kursyer asgjë dhe askënd: Është derdhur edhe gjak nëpër rrugë, janë hedhur bomba, gaz lotsjellës dhe është thirrur në luftë vëllavrasëse.

2. Pas ardhjes në pushtet, tash Albin Kurti thotë që nuk e ka prioritet dialogun, dhe zbulon formula të ndryshme, përfshi “pesë kushte”, “tre principe”, “gjashtë pika” dhe zbulime të tjera të cilat janë harruar ca ditë më pas, ngase askush s’i ka marrë seriozisht – madje as ai.

3. Për dy vjet aleatët perëndimorë dhe qytetarët e presin Kryeministrin Kurti të marrë vendim dhe t’i jap drejtim dialogut, i cili ka pasur synim njohjen e ndërsjellë. E vonon procesin dhe krijon drama të përditshme, duke reduktuar dialogun në çështje teknike.

4. Pasi që përlahet me Lajçak, Borrell dhe gjysmën tjetër të botës, e si pasojë Kosovës i sjell edhe sanksione ndërkombëtare të cilat ende janë në fuqi, në një aksham pazar, pa kurrfarë koordinimi dhe me një paturpësi të pashoq, e pranon një statut të draftuar nga vetë Lajçak, të cilin e quante pro-serb, për autonomi pa njohje të ndërsjellë.

5. Tash, pasi që i ka parë rezultatet shkatërruese të politikës së tij të jashtme dhe udhëheqjes amatoreske të dialogut, Kryeministri qohet dhe propozon 7 pika dhe kthehet pikërisht aty ku kemi qenë para 3 vitesh, duke thënë se vetë do ta draftojë statutin.

Kryeministër, je edhe vonë edhe i vonshëm. Askush nuk po të merr seriozisht. Të gjithë, e më së shumti aleatët ndërkombëtarë, i injorojnë fjalimet dhe pikat e tuaja të shumta që propozon tash e sa vjet.
Kosova ende vuan nën sanskione bashkë me Rusinë dhe Bjellorusinë.
Fokusohu, merr vendime, e mos u merr me fjalime dhe postime. Facebooku nuk është mjet adekuat për “face-saving”.