“Calit” i ulet dënimi në 15 vjet burgim

Paneli i Gjykatës së Apelit të Dhomave të Specializuara të Kosovës (DhSK) ia ka ulur dënimin ish-komandantit të UÇK-së, Salih Mustafës, i njohur me nofkën “Cali”, nga 22 vjet burgim në 15 vjet.

Në njoftim thuhet se paneli i Gjykatës së Apelit të DhSK-së kundër Salih Mustafës i ka shqiptuar dënimet individuale ndaj tij për krimet e luftës të ndalimit arbitrar, torturës dhe vrasjes së paligjshme prej 8, 13 dhe 15 vjet burgim, si dhe ia ka shqiptuar dënimin e njësuar prej 15 vitesh burgim, duke e llogaritur edhe kohën në paraburgim.

“Më 10 shtator 2024, Paneli i Gjykatës së Apelit në çështjen Prokurori i Specializuar kundër Salih Mustafës shqiptoi dënimet individuale ndaj z. Mustafa për krimet e luftës të ndalimit arbitrar, torturës dhe vrasjes së paligjshme prej tetë, 13 dhe 15 vjet burgim si dhe ia shqiptoi dënimin e njësuar prej 15 vitesh burgim, duke llogaritur dhe kohën në paraburgim”.

“Vendimi ka ndjekur udhëzimet e vendimit të Panelit të Gjykatës Supreme të datës 29 korrik 2024, lidhur me kërkesën e z. Mustafa për mbrojtjen e ligjshmërisë, i cili anuloi dënimin e z. Mustafa me 22 vjet burgim dhe ia ktheu çështjen përsëri Panelit të Apelit”, thuhet në njoftim, transmeton Klankosova.tv.

Kujtojmë se ky është apeli i dytë i “Calit”, pasi edhe në ankesën e tij të parë, dënimi i ishte ulur nga 26 vjet burgim, në 22. Ky vendim ishte marrë në fund të vitit 2023.

Salih Mustafa ishte arrestuar më 24 shtator të vitit 2020, i cili në kohën e luftës ishte epror i UÇK-së në Zonën Operative të Llapit.