Bulliqi prezantoi para qytetarëve projektet e realizuara

Kryetari i Komunës së Podujevës, Shpejtim Bulliqi ka mbajtur takim publik me qytetarë, të cilët i informoi për projektet e realizuara, ato që janë duke u realizuar në gjashtëmujorin e parë të vitit 2024, si dhe për projektet që janë planifikuar të realizohen gjatë këtij viti.

Në këtë diskutim morën pjesë edhe nënkryetarja e Komunës, Marigona Lahu dhe drejtorë komunalë.

Kryetari Bulliqi tha se qëllimi i këtij takimi është pasqyrimi i projekteve që janë realizuar për këtë periudhë, ato që janë paraparë për pjesën e dytë të vitit, si dhe t’i dëgjojnë kërkesat dhe sugjerimet e qytetarëve lidhur me projektet që atyre u interesojnë.

Duke prezantuar projekteve dhe investimet kryesore për secilën drejtori, ai e përmendi rregullimin e ambienteve të jashtme të Komunës, si dhe renovimin e brendshëm të Administratës Komunale, ku qytetarët tashmë mund t’i marrin të gjitha shërbimet që iu duhen në katin përdhesë. Pastaj miratimin e Kornizës Afatmesme Buxhetore 2025-2027, ku për vitin 2025 parashihet një buxhet për mbi 2 milionë euro me shumë se këtë vit.

Gjatë këtij takimi me qytetarë, Kryetari prezantoi investimet në Arsim, ku tha se dy objekte të reja shkollore (në Obrançë dhe Dumosh) tashmë veç janë përfunduar dhe pritet të hapen më 1 shtator, ndërtimin e objektit të shkollës në Lluga, nisjen e punimeve në shkollën e fshatit Shajkoc, nënshkrimin e kontratës për Shkollën Ekonomike, ndërtimin e disa çerdheve (si ajo në qytet, Batllavë, Kërpimeh), etj.

Sa i përket investimit në asfaltimin e rrugëve, Shpejtim Bulliqi, thekoi se janë mëse 30 fshatra në të cilat do të asfaltohen rrugët këtë vit, por pa anashkaluar edhe rrugët në qytet, sikur rikonstruimi i Rrugës “Xhemajl Mustafa” dhe ndërtimi i rrugës së re skaj lumit Llap që e lidh magjistralen Podujevë-Prishtinë deri te Rruga “Vëllezërit Frashëri”.

Ai po ashtu e përmendi ndërtimin e Urgjencës së Qytetit në vlerë prej 1.7 milionë euro që është bashkëfinancim me Qatar Charity, përfundimin e projektit të Stacionit të Autobusëve në vlerë 1.3 milionë euro (bashkëfinancim me MZHR-në), ndërtimin e mbi 50 rrugëve me kubëza dhe ndërtimin e trotuareve, nisjen e procedurave për ndërtimin e Zonës Industriale në vlerë afro 4 milionë euro (bashkëfinancim me MINT), subvencionet në Bujqësi, Shëndetësi, Kulturë, Arsim dhe një varg projektesh tjera që janë realizuar, janë në proces ose që parashihen të realizohen këtë vit.

Pas prezantimit të projekteve, kryetari Bulliqi hapi diskutimin me qytetarë, të cilët patën mundësi t’i paraqesin kërkesat e tyre. Kryetari i Komunës, iu premtoi se do të angazhohet maksimalisht për t’iu dhënë zgjidhje kërkesave që ata paraqitën.