Në Kazermën “Adem Jashari” në Prishtinë u mbajt ceremonia solemne e diplomimit dhe betimit të 12 kadetëve të Forcës së Sigurisë së Kosovës, të cilët përfunduan me sukses studimet katërvjeçare në programin ushtarak në Qendrën për Studime Universitare pranë Akademisë së Mbrojtjes së FSK-së, si dhe përgatitjen akademike në Universitetin Amerikan në Kosovë.

Në ceremoni morën pjesë ushtruesja e detyrës së presidentes së Republikës së Kosovës, Albulena Haxhiu, kryeministri në detyrë, Albin Kurti, ministri i Mbrojtjes, Ejup Maqedonci, KOMFSK, gjenerallejtënant Bashkim Jashari, udhëheqës të lartë të FSK-së, oficerë, nënoficerë, përfaqësues të institucioneve të Republikës së Kosovës, partnerë ndërkombëtarë, si dhe familjarë e mysafirë të shumtë.

Ceremonia filloi me raportimin para ushtrueses së detyrës së presidentes së Republikës së Kosovës, dhe Komandantit të Forcës së Sigurisë së Kosovës, ndërsa kulmoi me betimin solemn të kadetëve të gjeneratës 2026. Pas dhënies së betimit, ata u graduan me gradën nëntoger, duke u bërë udhëheqësit më të rinj të Forcës së Sigurisë së Kosovës, të gatshëm për t’i shërbyer Republikës së Kosovës me profesionalizëm, integritet dhe përkushtim.

Diplomimi dhe betimi përfaqëson një moment të rëndësishëm në zhvillimin e kapaciteteve profesionale të FSK-së dhe një dëshmi të përkushtimit për ndërtimin e një force moderne, të aftë dhe në përputhje me standardet më të larta ushtarake.