Seanca e sotme në Kampin Nacional të FFK-së në Hajvali ishte e veçantë. Talentet e rinj të Akademisë zbritën në fushë për t’u përballur me prindërit e tyre, duke krijuar momente plot buzëqeshje, emocione, argëtim dhe rivalitet sportiv.

Akademia, e cila ka nisur punën me talentet e gjeneratës U13 në muajin mars, zhvillohet nën udhëheqjen e ekspertit të FIFA-s, Rainer Kraft, ndërsa i gjithë projekti realizohet nën monitorimin e udhëheqëses së programit FIFA Talent Development Scheme në FFK, Sanije Krasniqi.

Rainer Kraft: “Zhvillimi individual i futbollistëve është në qendër të projektit FIFA Talent Academy”.

Eksperti i FIFA-s u shpreh shumë i kënaqur me progresin e futbollistëve pas katër muajve të punës intensive, duke theksuar se stërvitja në një mjedis me lojtarët më të mirë të gjeneratës së tyre i sfidon vazhdimisht dhe ndikon drejtpërdrejt në zhvillimin e tyre.

Ai rikujtoi se projekti nisi me skautimin e mbi 500 futbollistëve në të shtatë rajonet e Kosovës, ndërsa pas disa fazave përzgjedhëse u formua grupi prej 19 futbollistëve, që përbën Kombëtaren U13 të Kosovës.

Sipas Kraft, misioni i këtij projekti nuk është vetëm ndërtimi i një ekipi konkurrues, por mbi të gjitha zhvillimi individual i secilit futbollist, me synimin që në të ardhmen ata të jenë pjesë e ekipeve kombëtare të moshave dhe më pas e Kombëtares A.

“FIFA thotë: ‘Jepini çdo talenti një mundësi’. Pikërisht ky është misioni ynë dhe arsyeja pse ky projekt është kaq i rëndësishëm për të ardhmen e futbollit në Kosovë”, theksoi Kraft.

Pas pushimit trejavor, talentet do t’i rikthehen stërvitjeve për të vazhduar rrugëtimin e tyre drejt zhvillimit dhe realizimit të potencialit maksimal.