Pasditen e së martës, Arlinda Zekajt i është dhënë lamtumira e fundit. Ajo para dy ditësh u vra nga ish-kunati i saj, që vazhdon të jetë ende në arrati.
Në ceremoninë e varrimit kanë marrë pjesë shumë qytetarë.
I pranishëm ka qenë edhe djali i saj 12-vjeçar, që tashmë është marrë nën përkujdesje të shtetit.
Derisa, emocionet kanë qenë të shumta të familjarëve të saj, të cilët nën lot kanë përcjellë atë për në banesën e fundit.
Kryeministri i Kosovës, Albin Kurti, ka bërë me dije të martën se Ministria e Drejtësisë (MD) dhe Ministria e Punëve të Brendshme (MPB) kanë edhe 54 orë për ta dorëzuar raportin për rastin e vrasjes së Arlinda Zekajt.
Ai ka paralajmëruar masa në përputhje me ligjin dhe rregulloret.
Kurti ka thënë se raporti duhet të sqarojë dështimet e mundshme në secilën hallkë të zinxhirit institucional, por edhe të trajtojë rastet e ngjashme, duke theksuar se gratë që përjetojnë dhunë vazhdojnë të jenë të rrezikuara nga personat që i kërcënojnë.
“54 orë nga ky moment i kanë Ministria e Punëve të Brendshme edhe Ministria e Drejtësisë, dhe kjo është rezultat që në seancën e mbrëmshme, kur u votua me 67 vota rezoluta, unë thashë që ata i kanë 72 orë. Natyrisht që do të ketë edhe masa në përputhje me ligjin e me rregulloret. Ne do të bëjmë gjithçka që mundemi, e dimë, por tash shpejtësia është kryesore”, ka thënë Kurti.
Tetë gra janë vrarë në Kosovë, kryesisht nga partnerë e ish-partnerë, deri më tani gjatë vitit 2026. Kjo i bie mesatarisht një grua çdo pesë javë.
Vrasja e fundit, ajo e Arlinda Zekajt në Vitomiricë të Pejës, më 25 tetor, ka rikthyer në diskutim publik pyetjet për reagimin e institucioneve ndaj dhunës në familje dhe për efektivitetin e mekanizmave të mbrojtjes.

