Ndeshja që askush nuk dëshironte ta luante u shndërrua në një përballje që askush nuk donte të përfundonte.

Anglia triumfoi 6-4 ndaj Francës në sfidën për vendin e tretë të Kupës së Botës 2026, duke dhuruar një nga ndeshjet më spektakolare në historinë e turneut, transmeton Klankosova.tv.

Ylli i Arsenalit, Bukayo Saka, ishte protagonisti absolut i mbrëmjes, duke realizuar një “hat-trick” dhe duke u bërë vetëm futbollisti i dytë në historinë e Anglisë që shënon tre gola në një ndeshje me eliminim direkt të Kupës së Botës, pas legjendarit Sir Geoff Hurst në finalen e vitit 1966. Në histori, vetëm Pele kishte arritur një tjetër “hat-trick” ndaj Francës në një Botëror, në vitin 1958.

Me këtë fitore, Anglia siguroi vendin e tretë dhe regjistroi rezultatin e saj më të mirë në një Kupë Bote që nga triumfi historik i vitit 1966, si edhe arritjen më të mirë ndonjëherë në një Botëror të zhvilluar jashtë territorit anglez.

Për më tepër, “Tre Luanët” mposhtën një kombëtare të renditur më lart se ata në renditjen e FIFA-s në një Botëror për herë të parë që nga fitorja ndaj Argjentinës në vitin 2002.

Pas zhgënjimit në gjysmëfinale ndaj Argjentinës, Anglia reagoi në mënyrën më të mirë të mundshme. Declan Rice dhe Ezri Konsa i dhanë avantazhin e shpejtë ekipit anglez, ndërsa Saka realizoi dy gola të tjerë për ta dërguar rezultatin në 4-0 që në pjesën e parë.

Franca nuk kishte shkuar kurrë në pushim me katër gola disavantazh që prej prillit të vitit 1930. Në pjesën e dytë, skuadra e Didier Deschamps, në ndeshjen e fundit të tij si trajner i “Gjelave”, reagoi fuqishëm.

Kylian Mbappe shënoi dy herë, ndërsa Bradley Barcola realizoi një gol tjetër, duke rikthyer emocionet dhe duke afruar Francën në rezultat. Mbappe, me këto gola, kaloi Lionel Messin dhe u bë golashënuesi më i mirë në historinë e Kupës së Botës me 22 gola, duke marrë gjithashtu kryesimin në garën për “Këpucën e Artë” të Botërorit 2026.

Megjithatë, në minutën e 87-të, Bukayo Saka kompletoi “hat-trick”-un e tij nga pika e penalltisë, pasi Djed Spence u pengua në zonë nga Malo Gusto.

Kur dukej se gjithçka kishte përfunduar, Ousmane Dembele shënoi në minutën e gjashtë të kohës shtesë për ta ngushtuar rezultatin në 5-4. Por vetëm dy minuta më vonë, Jude Bellingham depërtoi mes mbrojtjes franceze dhe vulosi fitoren 6-4 të Anglisë.

Për Francën, kjo ishte hera e parë që pësonte gjashtë gola në një ndeshje të Kupës së Botës dhe gjithashtu hera e parë pas 66 vitesh që lejonte gjashtë gola në një takim zyrtar.