Aleanca ka zhvilluar sot një aksion simbolik para objektit të Qeverisë së Kosovës, duke kritikuar qeverisjen e Albin Kurtit dhe Lëvizjes Vetëvendosje për situatën në sektorin e energjisë dhe krizën politike në vend.

Me moton “Kurti dhe LVV, nga terri energjetik në terrin politik”, përfaqësuesit e Aleancës hodhën thëngjill para objektit të Qeverisë, duke e lidhur simbolikisht aksionin me krizën energjetike dhe, sipas tyre, pasojat e politikave të pushtetit.

Në një deklaratë para mediave, deputeti i Aleancës, Burim Ramadani, tha se gjatë qeverisjes së Vetëvendosjes Kosova ka shpenzuar rreth 1 miliard euro për blerjen e energjisë elektrike.

“Nga terri energjetik në terr politik! Me Vetëvendosjen, nga terri energjetik, Kosova ka blerë rreth 1 miliard euro rrymë. Fort ka përfitu dikush, pra mafia energjetike. Punëtorët po paguajnë me jetë! Askush nuk jep përgjegjësi!”, deklaroi Ramadani.
Ai kritikoi gjithashtu situatën politike në vend, duke thënë se institucionet janë bllokuar dhe se qytetarët po përballen me pasojat e krizës.

“Institucionet janë bllokuar. Kosova po mbahet peng. Ndërsa qytetarët vuajnë, Vetëvendosje po kalkulon veç për pushtet”, tha Ramadani.

Në fund, deputeti i Aleancës ngriti pyetjen se kush po përfiton nga, siç e quajti ai, “terri politik”.

“Kur nga terri energjetik u blenë rreth 1 miliard euro rrymë dhe po përfiton mafia energjetike, pyetja sot është: Nga terri politik, kush po përfiton? Kosova nuk është pronë e pushtetit uzurpues. Kosova është e qytetarëve. Mjaft me terr. Mjaft me bllokadë”, u shpreh Ramadani.