Kryesia e Aleancës ka mbajtur sot mbledhjen e radhës, ku janë trajtuar çështjet kryesore që lidhen me organizimin dhe funksionimin e degëve të partisë në komunat e Kosovës.

Në kuadër të funksionalizimit të plotë të strukturave statutare, Kryesia ka formuar Komisionin për përgatitjen, organizimin dhe koordinimin e zgjedhjeve të brendshme në degët ku ende nuk janë mbajtur kuvendet zgjedhore.

Sipas Aleancës, konsolidimi i brendshëm është i domosdoshëm, veçanërisht në një periudhë kur vendi po përballet me zhvillime të rëndësishme politike.

Aleanca ka kritikuar situatën aktuale politike dhe ekonomike në vend, duke e cilësuar atë si një “krizë serioze politike” dhe “depresion të thellë ekonomik”.

Në komunikatë thuhet se ndërmarrjet vendore po përballen me vështirësi dhe rrezikojnë mbylljen si pasojë e, siç pretendon kjo parti, politikave të gabuara të pushtetit.

Kritika të ashpra janë adresuar edhe për procesin e konstituimit të Kuvendit të Kosovës.

Aleanca e ka cilësuar si shkelje të rendit kushtetues dhe të demokracisë bllokimin e këtij procesi, duke pretenduar se 120 deputetëve të zgjedhur nga qytetarët po u mohohet ushtrimi i mandatit të tyre.

“Uzurpatorët e pushtetit aktual po duan t’i mbajnë dyert të mbyllura, duke zgjedhur vetëm mashtrimin e opinionit publik”, thuhet në komunikatën e Aleancës.

Në fund, Aleanca ka bërë të ditur se do të vazhdojë punën në terren, me synim forcimin e strukturave partiake dhe përgatitjen për proceset e ardhshme politike.

“Po bëhemi gati për proceset që na presin”, përfundon komunikata.