Mbrojtësi i Kombëtares së Kosovës, Albian Hajdari, nuk do të jetë në dispozicion për ndeshjen e sotme ndaj Austrisë.

Federata e Futbollit e Kosovës (FFK) ka njoftuar se, përkundër përpjekjeve maksimale të stafit mjekësor për ta rikuperuar në kohë, lëndimi që Hajdari pësoi në ndeshjen e fundit ndaj Irlandës nuk i ka lejuar atij të jetë i gatshëm për sfidën ndaj Austrisë.

Sipas FFK-së, gjatë ditëve të fundit është punuar intensivisht për rikuperimin e futbollistit, ndërsa edhe vetë Hajdari ka shprehur dëshirën e madhe për të qenë në fushë dhe për ta ndihmuar ekipin.

Megjithatë, pas ekzaminimeve mjekësore është konstatuar se ai nuk mund të aktivizohet në ndeshjen e sotme.

Hajdari do të vazhdojë të jetë nën përkujdesjen e stafit mjekësor të Kombëtares, me fokus në rikuperimin e plotë të tij.