Trajneri Albert Sylejmani ka përfunduar me sukses fazën e dytë të FIBA Europe Coaching Certificate (FECC), një prej programeve më prestigjioze për edukimin e trajnerëve në basketbollin evropian.

Faza e dytë e programit u zhvillua në Trentino, Itali, nga 26 korriku deri më 2 gusht 2026, në kuadër të FIBA U16 EuroBasket, ku Alberti mori pjesë në ligjërata dhe sesione praktike të udhëhequra nga personalitete të njohura të basketbollit si Svetislav Pešić, Erdem Can, Marco Ramondino, Israel González dhe Prof. Nenad Trunić.

Programi FECC u ofron trajnerëve nga e gjithë Evropa mundësinë të mësojnë nga ekspertët më të mirë të basketbollit, të shkëmbejnë përvoja me kolegë nga vende të ndryshme dhe të zhvillojnë njohuritë e tyre në identifikimin dhe zhvillimin e talenteve të rinj.

Sylejmani e përfundoi fazën e parë të programit vitin e kaluar në Gjeorgji, ndërsa FECC përbëhet nga tri faza të organizuara gjatë Kampionateve Evropiane të grupmoshave të reja.

Deri më tani, nga ky program kanë diplomuar edhe trajnerët Valentin Spaqi, Gyltekin Selimi, Dritëro Sefaja, Edon Godeni, Petrit Zeqiri dhe Ilir Selmani – të gjithë të nominuar nga FBK-ja.

Federata e Basketbollit e Kosovës e përgëzon Albert Sylejmanin për përfundimin me sukses të fazës së dytë të programit dhe i uron suksese në fazën e tretë dhe përfundimtare të FECC.