Presidenti i Federatës së Futbollit të Kosovës (FFK), Agim Ademi, ka uruar FC Dritën për kualifikimin në “play-off”-in e UEFA Conference League, pas fitores së thellë 5:0 ndaj Tre Fiorit.

Ademi ka përgëzuar futbollistët, stafin teknik, drejtuesit e klubit dhe tifozët “Intelektualët” për suksesin e arritur në garat evropiane.

“Kampionia e Kosovës, FC Drita, ka siguruar me plot meritë kalimin në ‘play-off’-in e UEFA Conference League”, ka shkruar Ademi.

Pas fitores 4:1 në ndeshjen e parë, Drita triumfoi edhe në duelin e kthimit me rezultat 5:0, duke e mbyllur pjesën e parë me epërsi 3:0 dhe duke shënuar edhe dy herë në pjesën e dytë.

“Përgëzime futbollistëve, stafit teknik, drejtuesve të klubit dhe tifozëve ‘Intelektualët’ për këtë sukses të rëndësishëm, që i sjell nder futbollit të Kosovës në arenën evropiane”, ka shkruar më tej presidenti i FFK-së.

Drita në “play-off” do të përballet me Inter d’Escaldes, ndërsa Ademi i ka uruar klubit gjilanas sukses edhe në këtë përballje dhe një tjetër përfaqësim dinjitoz të futbollit kosovar në arenën evropiane.